Adi RTVEri

Atzo Joseba Agudoren atxiloketaren berri eman zuen RTVEk, itxura denez, gertatu aurretik. Baliteke burtsaren igoera edo jaitsierak ere bertan iragartzen hastea gertatu aurretik. Hori abantaila handia litzateke, bistan denez: herenegun Ibex-35eko(-%1,76) ia edozein akzio saldu eta atzo edo gaur goizean erosi izana, abantaila zatekeen. 35eko tropeletik, 31 akziok izan zituzten galerak atzo. Endesa (+%0,83) eta Edurnezuri (+%0,42) ez ia guztiek balioa galdu zuen. Gertatu aurretik jakitera, merezi zukeen Santander (-%3,44) edota BBVA (-%2,33) saldu izana; bederatzi hilabetean 6.740 milioi irabaztea ez du nahikoa izan burtsako erraldoiak. Sacyr (-%6,66) edota %5na pasa galdu zuten Abengoa, Cintra, Ferrovial eta Telecinco ere dexente argalago zeuden atzo, herenegun baino. AEBetan etxebizitza berrien salmentak jaitsi izanari egotzi zioten analistek jaitsiera; baina txerritxo ehiztariak urduri daudela bistakoa da. RTVEk edozer diola ere.



ING. Hirugarren egunez jarraian ING (-%4,96) aipatu behar. Urria ia osoa 12 euroz goitik eman du akzioak, baina aseguru atala bankutik banatuko dela jakinarazi denetik, amildu egin da banku laranjaren kotizazioa: atzo 8,54 euroan zen Amsterdamen.



Iberdrola. Erresuma Batuan zentral nuklearra egiteko eskubidea lortu du Iberdrola (-%0,48) eta GDF Suezen (-%0,17) kontrolpeko talde batek, 77 milioian. Ingalaterra iparraldeko Sellafielden indar nuklearra garatuko du Renovablesen (-%0,65) jabeak.