AEBek erreserbetako petrolioa erabiliko dute bertako findegiek lanean jarrai dezaten

Samuel Bodman AEBetako Energia idazkariaren arabera 770,2 milioi petrolio upel ditu bertako erreserbak, eta Gobernuak findegiei zenbat upel emango dizkien jakinaraziko du datozen orduetan.

Erreserbetako petrolioa Texas eta Louisianako kostaldean dauden gatz haitzuloetan gordetzen da. Urre beltza Mexikoko Golkoan dauden findegietara banatuko da horiek funtzionatzen jarrai dezaten.



'Katrina' zirimolak Floridako hegoaldetik hasita Louisiana eta Mississippiko kostaldeetaraino eragin dituen kalteek Mexikoko Golkoan dauden petrolio fabriken ekoizpenaren %92a geldiarazi du.

AEBetako hegoaldean eta New Orleanseko portuan dauden findegien lana ere eten du gertakari metereologikoak. Bodmanek esan duenez energia elektrikoaren gabeziak AEBetako hegoalde eta ekialdean dauden bi oliobide garrantzitsuenen lana bertan behera utzi du.

Nazioarteko Energia Agentzia ez dago ados hartutako erabakiarekin

Nazioarteko Energia Agentziak (AIE)AEBetako Gobernuak hartutako erabakia "goiztiarra" dela adierazi du, zirimolak eragindako kalteak oraindik zenbatugabeak direlako. AIEko zuzendari exekutiboaren hitzetan, "izuak eragindako erreakzio bat da, hurrengo astera arte ez baita jakingo zirimolak sortutako kalteen tamaina zenbaterainokoa den".

Zuzendariaren arabera, "merkatuaren ikuspuntutik zirimolaren eragina ez da hainbesterainokoa izan: findegiek petrolio estok handiak dituzte, eta baita fuel-oila eta gasolioa bezalako produktu eratorriak ere". Hala ere, gasolinarekin arazoak egon daitezkeela esan du, baina oraindik zortzi egunerako erreserbak daudela ñabartu du.