Joan den astean Martin Garitanorekin eta Javier de Andresekin bildu ostean, gaur elkartu da Iñigo Urkullu Eusko Jaurlaritzako lehendakaria Bilbaorekin. Hiru ahaldun nagusiek bat egin dute bilketak handitu egin behar duela eta horretarako derrigorrezkoa dela erreforma bat. Aldundiek kudeatzen dituzten zerga guztiak daude eztabaidagai.
Mahai gainean dagoen proposamenetako bat da zerga kenkarien txikitzea, bai sozietate zergan enpresek jasotzen dituztenak, baita herritarrek errenta zergan jasotzen dituztenak ere. Azken horien artean bi dira nagusi: BGAE edo pentsio osagarriak izateagatik eskuratzen dena eta etxebizitza erosteko mailegua izateagatik jasotzen dena. Azken hori gaur egun eskuratzen dutenei kentzea baztertu egin du Bilbaok.
