Greziak bigarren erreskatea jasotzearekin batera, aurretik jasotako maileguen interesak jaitsi eta ordaintzeko epeak luzatu zituzten euroguneko herrialdeek, eta inbertitzaile pribatuek zorraren erdia barkatu zioten Atenasi.
Tentsio handiko prentsaurrekoa izan da, eta desadostasun handiak erakutsi dituzte bi herrialdeetako finantzetako arduradunek. "Ez gara ados jarri ezta ados ez gaudela esatean", onartu du Varufakisek. Denbora eskatu dio Alemaniari, Greziarentzat ere onargarria den akordio bat lortzeko denbora.
Schaueblek, berriz, aurreko gobernuak hitzartutakoa betetzeko eskatu dio Greziako gobernu berriari, eta esan du Atenasek azken egunotan egindako urratsak "okerreko norabidean" doazela. Greziari laguntzeko prest azaldu da, baina hark konpromisoak betetzen baditu: "Soilik lagun diezaiekegu beren burua laguntzen dutenei".
Alemaniak oso begi txarrez hartu ditu Alexis Tsiprasen gobernu berriaren lehen iragarpenetako batzuk, hala nola portu eta aireportuen pribatizazioak geratuko dituela, gutxieneko soldata aurreko mailara igoko duela berriro, pentsiodun pobreenei aparteko sari bat itzuliko diela, eta kaleratutako milaka langile publiko berriro hartuko dituela. Horiek Alexis Tsiprasen hauteskunde kanpainako promesak izan ziren. "Ez du ezer okerrik agindutakoa betetzea, baina promesa horiek beste batzuen kontura direnean, ez dira errealistak", argudiatu du Schaueblek.
