Andres Iturburu Narbona 58 urteko langilea bat-batean zendu da bart Amurrion, Aceralava lantokian beharrean ari zela. Ustez bihotzekoak jota hil da, baina CCOO-Euskadik jakinarazi du amiantoak kaltetuta zegoela Iturburu. LABek lan istriputzat jo du heriotza.
Tubacex taldeko enpresako langile batzordeak deituta, 24 orduko lanuztea egiten ari dira. Batzordearen arabera, osasun arriskuak saihesteko neurriei ez die jaramon handirik egiten Tubacexek. "Berdin dio langileon osasunak".
Amiantoak Kaltetutakoen Euskadiko Elkarteak duela bi aste zioen amiantoa osasunerako substantzia toxiko kaltegarria dela dakitenetik, horrek Araba, Bizkai eta Gipuzkoan 159 langile hil dituela. Frantzian, Belgikan eta Herbehereetan kalte-ordainak ematen dituztela esan zuen, dirua administrazioak, inplikatutako enpresek eta norbanakoek jarrita, eta EAEn ere eman beharko lituzketela.
