Beasaingo CAFeko Emilio Sanchez Ballesteros 67 urteko behargina joan den urtarrilaren 3an hil zen. Amiantoarekin lan egitearen ondorioz, minbizia sortu zitzaion, eta haren ondorioz zendu zen. Sanchezen omenez, lankideek ordubeteko geldialdia egin dute gaur goizean Beasainen, CAFen sarrera nagusian, amiantoaren biktimen omenezko monumentuan.
25 langile hilik
Kontzentrazioan gogoan izan dituzte amiantoarekin lan egitearen ondorioz gaixotuta Beasaingo CAFeko lantegian hil diren 25 langileak. Halaber, salatu egin dute auzi honekin lotura duten enpresen jarrera, "gaixo edo hildakoengatik kalte-ordainak eskatzeko oztopoak" jartzen dituztela eta.
Halaber, administrazioaren jarrera ere salatu dute, "kalte-ordain funts baten sorrerari uko egiten diotelako". Esan dute bide hori zabalduz gero biktimek ez luketeela auzitara jo behar.
