Deslokalizazioak eragoztea edo haien kaltea mugatzea helburu duen arau bat onartu du gaur Arabako Batzar Nagusietako Ogasun batzordeak. Enpresei emandako laguntzei buruzko foru arauan azaltzen denez, deslokalizazio prozesu batean dauden enpresek zigorrak ordaindu beharko dituzte.
Deslokalizazioa zer den zehaztu nahi du arauak. Haren arabera, enpresa bat-batean itxi eta beste leku batera joatea ez ezik, lekutze hori epeka egitea ere izango da. Horrela, lantaldea gutxienez %35 gutxitu duen enpresa bat deslokalizatzen ari dela aintzat hartuko da baldin eta hiru urteko epean jarduera beste leku batean hasten badu. Kasu horretan, aurreko zortzi urteotan jasotako diru laguntza publikoak itzuli beharko ditu, eta ezingo du dirurik jasoko hurrengo zortzietan.
EH Bilduk azaldu duenez, talde politiko guztiek egin dute arauaren alde, PPk izan ezik.
