Aralarrek zerga kenkari batzuk ezabatzeko eskatu du

Zerbitzu publikoei eutsi ahal izateko zerga sistema azken jaitsieren aurretik zegoen egoerara itzultzeko eskatu du Aralarreko Gipuzkoako Batzar Nagusietan. Rebeka Ubera batzarkidearen iritziz, «orain inoiz baino ezinbestekoagoa da galtzerdiari buelta ematea eta EAJren gobernu neoliberalek egindako politika aldatzea». Zehazki, talde abertzaleak eskatu du etxebizitza erosteagatik herritarrei ematen zaien zerga kenkaria kentzea errenta handiak dituztenei, eta gizarte aurreikuspeneko sistemen aldeko kenkari guztiak ezabatzea. Kapital errentak lan errentekin parekatzea, elkarteen gaineko zerga igotzea eta ondarearen gaineko zerga berreskuratzea proposatu ditu Aralarrek.