ATZERAPENA ESKATU, MAILEGUA LORTU

Autonomia erkidegoetako arduradunak estatuari zor diotena pagatzeko erraztasun bila joan ziren atzo Madrilera. Eskatu, denbora eskatu zuten, bost urte beharrean, hamar emateko Ogasunari zor dizkioten 23.000 milioi euroak itzultzeko; lortu, berriz, zorraren erdia pagatzen lagunduko dien mailegua lortu zuten. Erkidegoen zorpetzea mugatzeaz ere aritu ziren, baina ez espero bezain gogor, bakoitzaren beharren arabera diseinatutako sabaiak hitzartzea proposatu baitzuen Salgadok. Eta hori Auzitegi Konstituzionala alde zuela, Gobernuari erkidegoen zorpetzea mugatzeko boterea aitortu baitzion bilera hasi baino ordu batzuk lehenago.