Nafarroako Gobernuak 2011ko aurrekontuetan 294,3 milioi euro gutxiago gastatuko ditu, murrizketak eginda, gaur jakinarazi duenez. Galerarik handiena Kultura Sailak jasango du: %12,3koa. Nezakal Garapena, Industria, Enplegua eta Ingurumenak %10eko kaltea izango dute. Gobernuak defizit publikoa %1,3ra jaitsi nahi du aurten, eta azaldu du hasierako aurreikuspena 327,2 milioiko murrizketa egitea zela.
294,3 milioi horietatik 191 milioi orain murriztuko ditu gobernuak, eta, haren arabera, oraindik ez dauka erabakita 60 milioi nondik kenduko dituzten.
Gobernu osoko kideak egon dira agerraldian, eta Yolanda Barcina lehendakariak, Roberto Jimenez lehendakariordeak eta Alvaro Miranda Ekonomia eta Ogasun kontseilariak hitz egin dute. "Egoera ekonomiko honengatik behartuta gaude erabaki hau hartzera. Erabaki gogorra da, baina ausarta", esan du Barcinak.
Abiadura handiko trenaren egitasmoak ez du murrizketarik izango, exekutiboak esan duenez, eta adierazi du Espainiako gaurko gobernuak proiektuarekiko dituen konpromisoei eutsi egingo diela.
