Bahiketak

Alakrana bahitu dute Indikoan eta igoerak bahitu dituzte Jose Mari Olabarri kalean. Urriko sareak zulo asko ditu: atzo %1,66 galdu zuen Ibex-35 indizeak eta baita 11.400 puntuen maila ere. Branka goizetik zeukaten indizeek galeretarantz begira jarria eta, 3.018 milioiko salerosketa sendoarekin, berri txarrak baieztatu baino ez zituen egin. %2na pasa galdu zuten bi banku handiek eta %0,75 Edurnezurik. Babes militarrarena egin izan duen Wall Street ez zen inondik agertu: AEBetan langabezia %9,8ra igo izanak eta bankuek kobratzeke dituzten maileguek baga handi samarrak eragin zituzten. Itsaskirriak %5,44 hondoratu zuen Tecnicas Reunidas eta %3na pasa Sacyr, Ferrovial, Cintra eta Arcelor. Iberdrola(-%1,6) nahiz Repsol-YPFk (-%1,18) ere ez zuten erreskate talderik osatu; FCCk (+%1,99) baino ez zituen behar besteko armak erakutsi. Nagusi izan den baikorkeriak mugarriren bat behar zuen eta, itxuraz, langabeziarengan topatu du.



Acciona.Aerosorgailuak ekoizteko Txinan zuen lantegia saldu egin du Accionak (-%2,16). Berezko teknologia duen Acciona Windpowerrek, Barasoainen (Nafarroa), Valentzian (Herrialde Katalanak) eta AEBetan dituen lantegiei eutsiko die.



Solaria (-%4,56) energia berriztagarrien enpresak lau kontinentetan hedatzeko egitasmoa jakinarazi dio CNMVri. Frantzia, Maroko, Brasil nahiz Txina barne hartzen ditu, besteak beste, eguzki plakak saltzen dituen enpresaren egitasmoak.