Eloy Velasco epailearen arabera, Banca Civicak "bere balioaren argazki zintzoa" igorri zuen merkatura, eta, beraz, ez du bat egiten UPD alderdiak egindako salaketarekin.
Horrela, aurretik hartutako erabakia berretsi du, eta atzera bota ditu Fiskaltzak, UPDk, eta Miguel Sanz Nafarroako presidente ohiak jarritako helegiteak. Ekainaren 12an emandako ebazpenean epaileak ez zuen deliturik atzeman, ez Banca Civicaren bat egitean, ez burtsara ateratzeko operazioan, ez Caixabankek hura erosteko prozesuan.
Eloy Velascok ekaineko autoan espresuki erabaki zuen CAN fundazioak, Nafarroako Kutxaren egungo jabeak, ez zuela behar besteko informazioa igorri. Gerora Velascok berak onartu zuen "akats" egin zuela hori hala esanda. Hala ere, bere erabaki nagusia ez du aldatu eta CANeko inbertsioen ikerketa Iruñeko epaitegira itzultzea berretsi du.
