Gogo txarrez egin badu ere, Bizkaiko Foru Aldundiak iragarri du ez diela 2014an soldatarik igoko bere langileei. Unai Rementeria bozeramaileak azaldu duenez, aldundiko zerbitzu juridikoei galdetu diete aukerarik ba ote zuten Espainiako Gobernuaren neurria ez jarraitzeko, baina legea derrigorrez bete beharrekoa dela ziurtatu diete.
Aldundiaren menpeko langile publikoei soldata izoztea kritikatu du Rementeriak, «esfortzu bat baino gehiago egin dutelako krisi garai honetan eta hainbat urte daramatzatelako igoerarik gabe. Eusko Jaurlaritzaren moduan, 2014ko ekaineko eta abenduko aparteko bi lansariak urtarrilera eta uztailera aurreratuko ditu.
Aldundiaren azalpenak ez ditu ontzat hartu ELAk. «Espainiako Gobernuaren erabakiekiko erabateko menpekotasuna» erakutsi du Bizkaiak, «Madrilen sukurtsal hutsa izatea». Sindikatuak gogorarazi dio Gipuzkoako Aldundiak bilatu zuela bide bat bere langileei sariak igotzeko.
