Bizkaiko kamioi gidariek kalkulu bat atera dute: Supersur Bilboko hegoaldeko saihesbide berria erabiltzeagatik bakoitzak hilean 800en bat euro. Eta "gehiegizko bidesaria" dela iritzita, errepidea ez erabiltzea erabaki dute, gaur jakinarazi dutenez. "Boikotatu" egingo dute, eta alternatiba gisa Txorierrin ibiliko dira. Bizkaiko Foru Aldundiak "ezarritako" bidesaria da, haien ustez, eta ez dute baztertu geldialdiak egitea.
Amaia Martinez (Sintrabi), Jon Mikel Abellanal (EGAS) eta Enrique Perez (Atsetravi) agertu dira gaur prentsaurrekoan kamioi gidarien jarrera agertzeko, Bilbon. "Arloko gehiengo handi-handia" ordezkatu dute.
Supersurreko bidesariak "merkeagoak" izan beharko liratekeela esan dute, eta deskontuak izan beharko lituzketela saihesbidea gehien erabiltzen dutenek. "Beste autobide batzuetan prezioa kilometroko 15 edo 20 zentimokoa da, eta hemen, euro batekoa".
