Sindikatuek kontzentrazio "jendetsu" bat egiteko deia zabaldu dute gaurko, Sestaoko Kasko plazan, 20:00etan. Atzo, Europako Batzordeak Espainiari agindu zion inbertitzaileei ordainarazteko 2007tik 2011ra bitartean tax lease sistemaren bidez ordaindu ez zituzten zergak, eta erabaki horren kontra egingo dute protesta.
Ontziolak defendatu nahi duten herritar guztiak bildu nahi dituzte. Heriotza geldoa geldiarazten saiatu nahi dute oraindik ere.
Joaquin Almunia Europako Lehiakortasun komisarioak eman zituen erabakiaren inguruko azalpenak, eta adierazpen horiek kritikatu ditu Arantza Tapia Eusko Jaurlaritzako Garapen Ekonomikorako eta Lehiakortasun sailburuak. Esan du haren azalpen horiek "ironia handi bat" direla edo agerian uzten dutela "sektoreaz duen ezjakintasuna".
Radio Euskadin elkarrizketatu dute Tapia. Aitortu du ez zuela Europako Batzordearen erabakia espero, uste baitu badagoela nahikoa "argudio juridiko" erabakia bestelakoa izateko. Hala ere, gaineratu du jabetzen dela "Europako Batasunak nolabaiteko zigorra" jarri behar ziola Espainiako Estatuari.
Almunia, "minduta"
"Lotsa" eta "mina" sentitu du Almuniak, ikusita langileen "beldurrarekin nola jolastu" den tax lease-ari buruzko erabakiaren inguruan. "Mintzen nau ikusteak nola jolasten den dirurik itzuli beharko ez duten pertsonen beldurrarekin. Lotsa sentitu dut ikusita nola kudeatu den beldur hori", adierazi du.
Ser irrati katean egin diote elkarrizketa, eta bertan esan du "neurri pentsaezinetaraino puztu" dituztela erabakiak izango dituen ondorioak.
