PIVE2 planaren azken datua 50.000 auto gehigarri saldu direla da; horietatik 7.000 inguru Hego Euskal Herrian. Planarekin egindako erosketa guztien %7,5 Hego Euskal Herrian egin dira, Faconauto elkarteak dioenez. Elkarteak berak adierazi du saldutako sei autorekin lanpostu bati eustea lortzen dela; beraz, 1.150 bat langile ere izan dira planaren zeharkako onuraduak, lanpostuari eutsi diote eta.
Laguntzak jasotzearen truk txatartegira bidalitako autoen batez besteko antzinatasuna hamasei urtekoa da. Horien ordez erositako autoen prezioa 13.400 euro ingurukoa izan da. Datu hori kontuan hartuta, PIVE2 planarekin egindako salmenta gehigarriengatik 13.845.000 bat euro jaso dituzte Hego Euskal Herriko ogasunek.
