Estatuko funtzionarioei bezala, Espaniako Gobernuak aurten goi kargu instituzionalei ere soldatak izoztuko dizkie, 2012ko aurrekontuetako proiektuan ageri denez.
Mariano Raxoi gobernuko presidenteak 78.185 euro jasoko ditu, aurreko gobernuburu Jose Luis Rodriguez Zapaterok bezala. Honen exekutiboak 2010ean goi karguen soldatak %15 jaistea erabaki zuen. Hala, gobernuko presidentea, kasu, 91.982 euro jasotzetik 78.185 jasotzera pasatu zen iaz.
Beste soldata batzuk
- Soraya Saenz de Santamaria gobernuko presidenteordeak 73.486 euro irabaziko ditu aurten.
- Ministro bakoitzak 68.981.
- Carlos Divar CGPJ Botere Judizialaren Kontseilu Nagusiko presidenteak 130.000.
- CGPJko bokal bakoitzak 112.249.
- Pascual Sala Auzitegi Konstituzionaleko presidenteak 129.271.
- Auzitegi Goreneko eta Auzitegi Nazionaleko presidenteek 109.779.
- Eduardo Torres Dulce fiskal nagusiak 113.838.
Goi karguetako kostua 206,6 milioi eurokoa izango da auren, iaz baino hamar milioi gutxiagokoa.
