Optimize enpresako arduradun gorenak eta Bergarako Candy lantegiko enpresa batzordea elkartu ziren atzo, Foru Jauregian. Bileran, beharginen zalantza batzuk argitu zituen Luxenburgoko inbertitzaileak, eta akordioaren memorandum bat sinatu zuten bukaeran (Memorandum of Understanding); agiri horretan azaltzen da bi aldeak ados daudela Candyren berrindustrializazioa lortzeko.
Beraz, martxoaren 31ko epea agortu baino lehen bete egin da hiru aldeek (aldundia, Candy eta langileak) otsailean sinatu zuten akordioa, eta berrindustrializazio prozesuak aurrerapauso bat eman du. “Prozesua bere bidea egiten ari da; baikor gaude, nahiz eta badakigun bide bat egiteko daukagula oraindik ere, bukatu beharreko lan bat, Bergarako plantan lanean hasi aurretik; horregatik, zentzuz jokatzen jarraitu behar dugu”, adierazi du gaur Larraitz Ugarte aldundiko bozeramaileak.
Ugartek Candyko langileen jarrera eta gogoa azpimarratu ditu. “Langileak frogatzen ari dira enpleguaren alde borrokatzeko prest daudela eta ekimen berri honi aurre egiteko ausardia dutela”.
Laster, foru gobernuak hitzarmen bat sinatuko du Mondragon Unibertsitateko Goi Eskola Politeknikoarekin —aholkulari lanak egin ditu Candyren prozesuan—. Hitzarmenaren helburua da Berrindustrializaziorako Laguntza Unitate bat sortzea, foru aldundiak laguntza teknikoa behar baitu inbertitzaile berriak erakartzeko eta, Gipuzkoako enpresek ez dezaten itxi eta bertako industriak eta enpleguak aurrera egin dezaten, Candykoa bezalako ekimenei aurre egiteko.
