Confebask Araba, Bizkai eta Gipuzkoako enpresarien elkarteak jaitsi egin du aurtengo hazkunde aurreikuspena: %1,3tik %0,8ra. Lehengo astean Eusko Jaurlaritzak ere murriztu egin zuen aurreikuspena, datu zehatzik eman gabe.
Miguel Angel Lujua Confebaskeko presidenteak eta Nuria Lopez de Gereñu idazkari nagusiak azaldu dute aurten hiru herrialdeetan lau mila lanpostu galduko direla eta langabezia %10,8an kokatuko dela, Europa Batasuneko batez bestekoaren antzekoan.
Azaroaren 20ko hauteskundeen ondoren aterako den Espainiako Gobernuari "ekonomiak exijitutako egiturazko erreforma garrantzitsuak" egiteko eskatuko diote, "orain artekoak oso arinak izan direlako eta ez dutelako lana sortzeko balio izan". Dena dela, ez dute jakinarazi zein liratekeen erreforma horiek.
Haien arabera, biharko egunera begira "ongizateari eutsi baino gehiago, ongizatea ahal ekonomikoetara egokitu" egin beharko da.
