Miguel Angel Lujua Confebaskeko presidenteak greba eskubidea arautzen duen legediaren erreforma defendatu du, "lanera joan nahi dutenen eskubidea bermatzeko".
Lujuak esan du "erabat" beharrezkoa dela greba eskubidea bermatzea, baina baita "askatasun osoz" lanera joan nahi dutenen eskubidea bermatzea ere.
Martxoaren 29rako sindikatuek deitu duten greba deialdiaren aurka agertu da. Haren arabera, horrelako neurriekin ekonomia "ez da aurrera aterako", eta gaineratu du enplegurik ez dela sortuko.
Lujuak uste du grebak oihartzun "handia" izango duela, baina ohartarazi du martxoaren 29tik aurrera lanean jarraitu beharko dela. "Enplegua sortzen ez bada, oso gaizki pasatuko dugu", esan du.
