Bilboko epaitegi batek Bizkaiko metalgintzaren ultraaktibitateari buruz berriki emandako ebazpena hartu du ahotan Confebaskeko idazkari nagusiak Radio Euskadin, "egoera kafkianoa" dela esateko. Ebazpen horrek dio 2001-2003ko ituna indarrean dagoela oraindik, beste bat berritu arte ultraaktibitatea jasotzen duelako klausula baten bidez. Lopez de Gereñuk dio soldatak %30 jaitsi beharko liratekeela itun horren arabera. Hori da patronalaren irakurketa.
"Oraindik denbora tarte bat behar du" PPren gobernuak indarrean jarritako lan erreformak Confebasken ustez, eta bigarren erreformak, dagoeneko iragarria dutenak, legearen hainbat atal "zuzenduko" lituzke Lopez de Gereñuren arabera, kasurako, epaileek egiten dituzten irakurketak, euren ebazpenak alegia.
Izan ere, PPren gobernuaren asmoa lan erreforma onartzean lan itunak "betiko indarrean" ez geratzea zen, Confebaskeko buruaren ustez. "Ez da argi geratu idatzian, eta horregatik egin dira beste interpretazio batzuk".
