Urtero bezala, Getariako (Gipuzkoa) Antxoa Eguna baliatu du Eusko Jaurlaritzak antxoa kanpainaren inguruko datuak eta berdelarenak emateko. Antxoaren kanpainak "hasiera ona" izan duela azaldu du Bittor Orozek, Arrantzako sailburuordeak: "Euskadiko arrantzaleek jada 8.000 tona antxoa baino gehiago harrapatu dituzte, kiloko prezioa 1,42 eurokoa izanik batez beste".
Prezioa iazkoa baino apalagoa da (1,78 eurokoa izan zen iaz), baina harrapaketak handiagoak dira (6.000 tona izan ziren iaz). Oraindik hilabete batzuk falta dira arrantzaldia bukatzeko, eta Orozek espero du "kanpaina amaiera arrakastatsua iragarri ahal izatea" .
Berdela, iazkoaren paretsu
Berdelaren kanpainari buruzko datuak ere eman ditu Orozek, behin arrantzaldia amaituta. Aurten 11.000 tona berdel arrantzatu dituzte Bizkaiko eta Gipuzkoako itsasontziek, eta batez beste 0,97 euroan saldu dute kiloa. "Harrapaketak iazko ekitaldikoak baino zertxobait gutxiago izan dira, eta batez besteko salmenta perzioa, berriz, pixka bat handiagoa", zehaztu du. Izan ere, iaz 12.800 tona berdel porturatu zituzten, eta batez beste 0.93 eurotan saldu kiloa.
Antxoa kontsumitzeko aholkuak
Antxoak erosteko eta kontsumitzeko aholkuak eman ditu, halaber, Arrantza sailburuordeak, anisakis parasitoarekin arazoak saihesteko. Arrainak tripak kenduta erostea hobetsi du, eta bestela, ahalik eta lasterren norberak kentzea, erraien barrunbea bereziki garbituta.
Gomendatu du, halaber, arraina ondo eginda kontsumitzea. "Labean, txingarretan edo plantxan prestatzen bada, ireki arraina, barrukoa ere 60ºC-tan egingo dela ziurtatzeko". Arrainak gordinik eta marinatuta jaten badira, eta etxean prestatutakoak badira, aurretik izozteko aholkatu du, hozkailuan gutxienez 24 orduz edukita. "Eta nola prestatu diren ez badakigu, ahal bada ez kontsumitu".
