“Asper-asper eginda gaude beti merkataritza kate handien eta multinazionalen alde egiteaz. Beti limurtu gaituzte esanez denda txikien salmentak ugaritu egingo zirela jaiegunetan irekiz gero”. Baina ez dute horrekin bat egiten, eta, horregatik, Jaietan Jai plataformak mobilizazio kanpaina bat abiatu du jaiegunetan dendak zabaltzearen aurka. “Etsigarria da ikustea nola hiriak eta merkataritza guneak kate handien beharren arabera diseinatzen dituzten”.
Jaiegunetan dendak ez zabaltzeko deia egin die horregatik dendariei, eta kontsumitzaileei erosketak egin ez ditzatela eskatu. “Gure erosketak egiteko ordutegiak behar bezain zabalak dira, eta jabetu behar dugu zer eta noiz erosten dugun”. Kanpainarekin bat egiten duten dendetan kartel bat jarriko dute, adierazteko eurek jai egiten dutela jaiegunetan.
Une honetan, astero mobilizazioren bat egiten ari dira plataformako kideak jaiegunetan zabaltzen dituzten denden atarian protesta egiteko. Momenturen batean greba egiteko aukera ere aztertu zen, baina oraingoz aukera hori ez dute mahai gainean jarri. Adierazi dute, ordea, “mobilizazioa aurrera badoa ikusiko dela” aukera hori martxan jarri edo ez.
Erakundeei eskaera egin die plataformako kideek merkataritza lege berri bat martxan jar dezaten, eta bertan dendari txikiak babesteko mekanismoak eskatu dituzte. Plataforma plurala dela ere nabarmendu dute. Honako hauek hartzen dute parte: ELA, LAB, CCOO, UGT, ESK eta CGT sindikatuak, Euskaldendak, Araba denda eta Garen patronalak, EKA eta EKE kontsumitzaileen elkarteak, Bilboko auzo elkarteen federazioak, Donostiako bizilagunen plataformak eta SOS Alde Zaharrak, REAS sareak eta Ernaik.
