Bruselako, Madrilgo eta Pariseko udalek eraman zituzten Batzordearen muga berriak auzitegira, uste baitzuten Euro 6 arauarenak askogatik gainditzen zituztela.
Kontua da VWen isurketen eskandaluak erakutsi zuela CO2 edo beste gas kutsagarrien isurketak kontrolatzeko sistemak eskasak zirela, eta ibilgailuen benetako isurketak ezkutatzeko aukera handiak ematen zizkietela autogileei. Gauzak horrela, Europako Batzordeak onartu zuen azterketak baldintza errealagoetan egin behar zirela (RDE, ingelesezko laburduran). Baldintza berri horiekin auto gehienen isurketak ordura arteko mugak gaindituko zituztenez, gehienezko muga horiek igo zituen Bruselak, 2016an.
Muga horiekin, Euro 6 motorra zuten diesel motorreko ibilgailuek kilometroko 80 nitrogeno oxido miligramo beharrean, 168 miligramo isurtzeko baimena izango zuten lehen epe batean, eta 120 miligramo ondoren. Muga horiek bigunegiak zirela eta kutsadura handia baimentzen zutela ondorioztatu zuten Bruselak, Madrilek eta Parisek, eta helegitea jarri zuten Europako Batasuneko Justizia Auzitegian. Epaileek arrazoi eman diete, eta muga aldaraztea behartuko dute Europako Batzordea.
