Donostiako Udalak iazko otsailean jarri zuen martxan ekonomia sustatzeko plana, hiritarren lan munduratzea, enpresa berrien sorrera eta enpresa lehiakortasuna hobetzea errazteko helburuarekin. Zazpi milioi euroko aurrrekontua izan du. Plana amaituta, finkatutako xedeen "%100" bete direla adierazi dute udaleko ordezkariek. 1.151 enplegu eta 312 enpresa berri sortzen lagundu du egitasmoak.
Gehienbat merkataritzan eta ostalaritzan sortu dira enplegu horiek, baita estrategikotzat hartzen diren beste sektore batzuetan ere, surfean, energiaren arloan eta ikus-entzunezkoetan kasurako. Juan Karlos Izagirre alkateak iragarri du planak jarraipena izango duela.
