Lorea Bilbao EAJko batzarkideak, Esther Martinez PPkoak eta Unai Rementeria zein Jose Maria Iruarrizaga Bizkaiko Foru Aldundiko ordezkariek hedabideen aurrean sinatu dute Bizkaiko aurrekontuak onartzeko akordioa.
Bi alderdietako ordezkariak gustura agertu dira sinatutakoaz, “bizkaitarrentzat onena” dena egin dutela argudiatuta. Akordioa Bizkaiko aurrekontuetara mugatzen dela adierazi dute, baina bizkaitarren onurarako akordio gehiago egiteko esperantza azaldu dute.
PPko bozeramailearen hitzetan, “Bizkaiak historia osoan izan dituen aurrekonturik sozialenak” izango dira 2013koak. Eta hori PPk Foru Aldundiaren proposamenari egindako zuzenketa batzuk onartu izanari esker izango dela dio.
Akordioa alderdikerietatik aldenduta egin dutela esan du, eta ez dela “baliabide politikoa”. Martinezen hitzetan, “bizkaitarren hobebeharra” izan da bi alderdiek izan duten “lotura bakarra”. Adostasuna iragana atzean utzita lortu dutela azaldu du, eta etorkizunera begirakoa dela. “Akordio hau ez da amaiera; hasiera on bat izango den esperantza dut”.
EAJko bozeramaileak “akordioa eta adostasuna” lortu direla nabarmendu du. Ituna bizkaitarrengan pentsatuta soilik sinatu dutela berretsi du, eta horretara mugatzen dela: 2013rako Bizkaiko aurrekontuen onarpenera. “Ez dago bestelako aliantzarik”.
Batzar nagusietan akordio “gehiago eta zabalagoak” lortzen ahaleginduko dela ere adierazi du Bilbaok, eta, gainontzeko instituzioei begira ere, EAJren nahia dela “ahalik eta toki gehienetan eta ahalik eta erarik zabalenean akordioak egitea”.
Foru aldundiak proposatutako aurrekontuetatik 5,5 milioi euro inguruko aldaketa dakar EAJk PPrekin egindako itunak, eta otsail hasiera edo erdialdera espero da onartzea.
EH Bilduk eskaera egin dio EAJri: Bizkaiko gizarteari azal diezaiola zergatik egin duen ituna "Espainiako eskumarekin" azken urteetako aurrekonturik "antisozialenak" onartzeko.
