EBZk %1ean mantenduko du interes tasa, hamaseigarren hilabetez

Europako Banku Zentralak (EBZ) diruaren prezioa egonkor mantentzeko apustua egin du berriro. Oinarrizko interes tasak %1ean segituko du eurogunean, hamaseigarren hilabetez jarraian. Jean Claude Trichet EBZko buruak eman du gaur eguerdian prentsaurrekoa, eta ohartarazi du ziurgabetasun handiak daudela hazkunde ekonomikoaren inguruan. Hala ere, aurtengo bigarren eta hirugarren hiruhilekorako, aurreikusitakoa baino hazkunde handiagoa iragarri du.

Jean Claude Trichetek esan du analisi monetarioak baieztatzen duela inflazio presioak kontrolatuta daudela epe ertainera, lehengaiak eta zergak igo arren. Zentzu honetan, prezioek hegazkortasun edo bolatilitate handia erakutsiko dutela adierazi du, baina, gaur eguneko maila mantenduz. Bankari frantsesaren hitzetan, "inflazioa ainguratuta" dago.

Era berean, herrialde batzuetan anbizio handiagoko aurrekontuak beharrezko izan daitezkeela jakinarazi du, eta erantsi, "egiturazko erreformak ezinbestekoak" direla "hazkunde perspektibak indartzeko". Zentzu honetan, bigarren eta hirugarren hiruhilekorako iragarpenak "aurreikusitakoak baino hobeak izango dira". Hori bai, bigarren hiruhilekoa "ez da hirugarrena bezain arrakastatsua izango".

Dena den, hazkunde ekonomikoaren inguruko ziurgabetasunak handiak direla, eta, ziurtatu du, Barne Produktu Gordina irregularki hazi daitekeela denbora batean.