Edesako langile bazkideen taldeak otsailaren 10eko epemuga jarri du hark proposatutako bideragarritasun plana onartzeko. Halaber, Basauriko plantako beste langile batzuek eginiko laguntza eskariarekin bat egin du, ez dezaten lantegia itxi. Denbora "amaitzen ari da", ohartarazi dute.
Ohar bat plazaratu dute langile bazkideek, behargin guztiei eskerrak emanaz "planaren defentsan erakusten ari diren inplikazio, esfortzu eta babesarengatik". Plan horren helburua "lanpostuen mantentze iraunkorra" da, haien esanetan.
Epemuga jartzearen zergatiak ere azaldu dituzte: "Ezin da itxaropen mugagabea sortu plan honetan sinesten duten langile, bezero eta hornitzaileengan".
Datorren astean jakinaraziko dute zein den egoera, xehetasunekin. Egun, Bizkaiko eta Gipuzkoako aldundien, Eusko Legebiltzarreko Garapen Ekonomikoko Batzordearen eta Basauriko Udalaren babesa dute.
