Gipuzkoako Kaleratzeak Stopek, Gipuzkoako IRPH Stopek, Zero Pobreziak, Duintasunak, GEPEk eta Koordinadora Feministak antolatuta, pobreziaren aurkako manifestazioa egin dute gaur eguerdian Donostian. Ehunka lagun elkartu dira, eta epaiketak eta zigorrak eskatu dituzte "pobreziaren errudunentzat".
Protestan, Xabier Iturbe Kutxako presidentearen, Iñigo Urkullu Jaurlaritzako lehendakariaren eta Luis de Guindos Espainiako Ekonomia ministroaren aurpegiak zituzten kartelak eraman dituzte. Hainbat kartel ere itsatsi dituzte finantza erakundeen erakusleihoetan, "krisi honen errudunak seinalatzeko". Manifestarien esanetan, bankuetako eta multinazionaletako eliteak eta haien zerbitzura dauden "gobernu ustelak" dira egoeraren erantzule.
Azaldu dute Araba, Bizkai eta Gipuzkoan 127.000 pobre daudela egun. Hala, aurrekontuetan gizarte laguntzetarako behar adina diru jartzeko eskatu dute, "ez dadin egon pobrezia energetikorik edo elikai pobreziarik".
