Espainiako Gobernuak energia aurrezteko hartuko dituen neurriak iragarri ditu gaur; guztira, hogei neurri. Besteak beste: bizikletaren erabilera sustatzeko kredituak ematea, autoen gurpil zaharkituak aldatzea, eta udalerrietako eta errepideetako argiztatzea murriztea. Horrez gain, udal guztietako argiztatzea aldatzeko asmoa du gobernuak, eta bost urte beharko ditu egitasmo horretan.
Bestetik, autobideetan orduko 110 kilometroko abiadan joateko neurria lau hilabetez luzatzea erabaki dute; ekainaren 30era arte. Beharrezkoa izanez gero, gehiago luzatuko dutela adierazi du Alfredo Perez Rubalcaba Espainiako bigarren presidenteordeak.
RENFEko distantzia laburreko txartelen merketzea indarrean mantentzea ere erabaki dute. Hainbat autonomia erkidego azken neurri horren aurka azaldu ziren pasa den astean, eta kostu horiek bere gain hartuko ez zituztela adierazi zuten. Kostu horiek bere gain hartuko dituela ziurtatu du gaur Espainiako Gobernuak.
Neurri horiekin guztiekin kontsumoa %5 murrizteko asmoa du gobernuak, 2.300 milioi euro aurrezteko asmoarekin.
