Ekonomiak pattal jarraituz gero, bultzada emateko neurriak prest ditu Bernankek

Europako Batasunean hizpide bakarra murrizketak eta doikuntzak dira, eta AEBetako Erreserba Federalak, berriz, neurri sorta bat prest du ekonomiari bultzada emateko. Kongresuan egindako agerraldian, hiru aukera aipatu zituen Ben Bernankek, Fed-eko buruak: zor publiko gehiago erostea, garbi esatea noiz arte eutsiko dioten %0eko interes tasei edo bankuei gordailuen truke ematen dien %0,25eko interesa kentzea. Bernankek ez zuen aukeren artean bakar bat ere hobetsi, eta aitortu zuen agian ez dutela ezer egingo, baldin eta berak uste duen bezala ekonomiaren pattalaldia urtearen bigarren erdian amaitzen bada.