ELAk uste du "erreformen xedea lan baldintzen txirotze orokorra" bilatzea dela, eta Confebask EAEko patronalak badakiela Mariano Raxoi Espainiako gobernuburu berriarengandik "askoz gehiago" lortuko duela. Hala, sindikatuak aurreratu du ez duela sinatuko patronalarekin Euskal Autonomia Erkidegoko negoziazio kolektiboaren egiturari buruzko lanbidearteko akordiorik.
Adolfo Muñoz ELAko idazkari nagusiak eta Joseba Villarreal negoziazio kolektiboko arduradunak salatu dute erreformak patronalaren neurrira egiten dituztela. "Ez da enplegurik sortzen; aldiz, enplegu duinaren ordez enplegu prekarioa sortzen da. Soldata duina zuen langile baten postuan hiru behargin prekario jartzen dituzte, eta hirurek batera aurrekoaren soldata ez dute osatzen".
ELAko arduradunek azaldu dute UGT eta CCOO negoziazio kolektiboa zentralizatzeko ahaleginak egiten ari direla Madrilen. “Ordezkaritzaren monopolioa eta euren finantzaketa bilatzen dute", adierazi du Villarrealek.
Sindikatuek soldatak eta lan laldintzak defenditu behar dituztela esan du Muñozek. ELAk soldaten inguruko txostena plazaratu du gaur Bilbon, prentsaurreko honetan.
