ELAren iritziz, Espainiako Gobernuak ostiralean onetsitako 2012ko aurrekontuen egitasmoarekin "ekonomiaren atzeraldia areagotu, gizarte babesa mugatu eta langabezia ugaldu egingo dira". Haren arabera, "aurrekontuen esparrua erabaki politiko batek finkatu du; alegia, Espainiako Estatuko administrazioen defizit publikoa murriztu nahi duen erabaki politikoak".
Sindikatuak dei egin die Hego Euskal Herriko erakundeei murrizte politikarik ez ezartzeko, baita politika fiskalak eta aurrekontuak "goitik behera aldatzeko" ere, "enplegua behar bezala sustatzearren".
ELAk amnistia fiskala baztertu egin du eta uko egin die "administrazioetako langileen aurkako eraso berriei". Gogoratu du soldata izozketa berriarekin eroste ahalmenak %10 eta 13 bitarteko galera izan duela azken urteotan. Halaber, iruditzen zaio lanaldia 37 ordu eta erdira luzatzea edota lanpostu hutsak ez betetzea enplegu publikoa suntsitzeko neurriak dira.
