ELA oso kritikoa izan da BBK-k, Kutxak eta Vitalek bat egin eta banku bat, Kutxa Bank, sortzeko prozesuarekin. Gaur ere proiektuaren oinarria zalantzan jarri du, hiru kutxek bankua bat sortzea. Mikel Noval Gizarte Arloko arduradunarentzat bazegoen beste aukera bat: hirurak batu eta kutxa bat sortzea.
ELAk uste du bilduk eta kutxetako arduradunek lortutako akordioak funtsean ez dituela uxatu banku bat sortzeak eragiten dituen arriskuak. Bilduren eta kutxen akordioaren hiru zutabe nagusiak indargabetu ditu Novalek gaurko agerraldian.
Alde batetik, Kutxa Bankeko langileek Espainiako lan eremuan oinarritutako lan hitzarmena izango dute, akordioan ez baita propio esaten Hego Euskal Herriko langileek erabakitakoa errespetatuko denik, baizik eta "langileek" erabakitakoa, Hego Euskal Herritik kanpokoek barne.
Bestetik, ELArentzat Kutxa Bankek kapital eta inbertsiogile pribatuak sartzeko aukerak indarrean jarraitzen du. Kutxek kapital guztiari eusteko konpromisoa dute, "baldin eta ezarri beharreko beste edozein araudik, edota ahalmena duen erakunde zein administrazioren batek aurkakoa exijitzen badute".
Gizarte ekintzaren kasuan, ELAk irabazien %30 baino gutxiago bideratzeko arriskua aipatu du, %30 hori baldintzatua delako. Akordioak dio gutxienez bankuaren irabazien %30 bideratuko dela, "beti ere Sozietate Zentralaren kaudimenak eta ezarri beharreko arau erregulatzaileek ahalbidetzen badute". Novalek aipatu du kutxek ez dutela zehaztu kaudimen premia hori zenbatekoa den, eta, beraz, gutxiago bidera dezaketela: "Aurretik tranpa hor zegoen eta oraindik hor jarritzen du".
Horregatik guztiagatik, ELAk bat egiteko asmoaren kontra bozkatuko du etzi Kutxaren batzar nagusian.
