Elizak higiezinen zerga ez pagatzearen alde dago Raxoi

Eliza katolikoak ondasun higiezinen gaineko zerga paga dezala proposatu du PSOEk, baina Mariano Raxoik kritikatu egin du proposamena, «gauden egoeran egonda». Espainiako presidenteak ziurtatu duenez, Eliza salbuetsita dago zerga horretatik, 1979an Vatikanoarekin sinatutako itun baten ondorioz. Itun hori bere kasa aldatzeko «inolako asmorik» ez du Raxoik, eta beste erakunde batzuek ere ez dutela pagatzen oroitarazi du. Gainera, deitoratu egin du Alfredo Perez Rubalcabak proposamena orain egitea, ituna indarrean egon denetik hogei urtetan agintean izan direla kontuan hartuta. Aitortu du, halaber, ezin duela ziurtatu PPk bere egoitza guztien zerga pagatzen duela. «Hala izatea espero dut».