Enpresak finantzatzeko, beste ehun milioi euro jarriko ditu Kutxak

Kutxak urrian jaulkitako ehun milioi euroren maileguek arrakasta izan dute Gipuzkoako enpresen artean, eta jadanik kopuru hori erabili dutenez, beste ehun milioi jaulkitzea erabaki du Donostiako Kutxak.

Krisiak sortutako mesfidantza dela eta, enpresek geroz eta zailtasun gehiago dituzte finantzaketa lortzeko, eta horri aurre egiteko, Adegi Gipuzkoako enpresaburuen patronalak eta Kutxak akordioa sinatu zuten urrian, urtebeterako. Enpresek begi onez erantzun zioten finantzaketa bide berriari: epe horretan ehundik gora enpresa baliatu dira maileguaz, eta dagoeneko bete dute hasieran ezarritako kopuru hori.

Hori dela eta, «beste pauso bat» ematea erabaki dute bi erakundeek, «likidezia txikiagoa dagoen egoera honetan Gipuzkoako enpresen lehiakortasuna hobetzeko». Xabier Iturbe Kutxako presidentearen arabera, Gipuzkoako garapen ekonomikoa aurrera eramateko konpromisoa dauka Kutxak, eta, horretarako, hainbat produktu eta finantza zerbitzuari da eskaintzen. Eduardo Zubiaurre Adegiko presidentearentzat, «beharrezkoa» da enpresek finantzaketa lortzeko bitartekoak aurkitzea.