Kantabriago Gobernuaren eta Eusko Jaurlaritzaren arteko harremanak gaiztotzen ari dira. Santanderko agintariek lurzorua doan eskaini diete beren lurraldean inbertitu nahi duten enpresei. Neurri hori "legezkoa" dela dela ziurtatu du gaur goizean Ignacio Diego Espainiako erkidego horretako presidenteak, horrela ziurtatu diotelako bere gobernuko zerbitzu juridikoek. 240.000 metro koadro eskaini ditu Kantabriak, gutxienez 50 urtez erabili daitezkeenak, eta mailegu merkeak inbertsioa finantzatzeko.
Justu kontrakoa dela dio Eusko Jaurlaritzak. "Egiten badute, Europako Batzordera eta Europako Auzitegira joko dugu", ohartarazi zuen atzo Jaurlaritzako bozeramaileak, Josu Erkorekak. Eusko Jaurlaritzak oso esperientzia txarrak izan ditu iraganean Europako erakundeekin enpresei emandako laguntzekin eta, bereziki, opor fiskalekin.
Gasteizko gobernua beldur da lurzorua doan lortuz gero, enpresa batzuek Kantabriarako bidea har dezaketela, oraintsu Tubacexek egin duen moduan. Arabako enpresak erabaki du lantegi berria Solaresen (Kantabria) irekitzea. Lurzoruaren prezioa baino, Laudioko eta Amurrioko fabriketako "lan kostu handiak" argudiatu ditu altzairuzko hodien egileak.
