Gipuzkoan enpresek hemendik aurrera lan hitzarmena bete beharko dute foru aldundiaren obra publiko guztietan, Diputatu Kontseiluak erabaki duenez. Izan ere, haren ustez, "oso garrantzitsua da langileen lan baldintzak bermatzea", eta neurri hori ezartzea beharrezko ikusi du "Madrildik inposatu nahi diren lan erreformei aurre egiteko".
Ondorioz, lan publikoetako lizitazioetan parte hartu nahi duten enpresek "langileen lan baldintza duinak eta seguruak bermatzea ziurta dezake" aldundiaren neurriak.
Diputatu Kontseiluak egokitzat jo du aldundiak onartzen dituen obra publikoak kontratatzeko prozedura guztiei lan, gizarte segurantza eta lan eta osasun segurtasuneko klausula bat gehitzea. Horren arabera, enpresa guztiei eskatuko diete Eraikuntzaren eta Obra Publikoen Gipuzkoako Hitzarmen Kolektiboa "zehatz-mehatz" betetzea. Betekizun hori, gainera, esleipen hartzaileek ez ezik horiek azpikontratatzen dituztenek ere bete beharko dute.
