Argia da Europatik Espainiako presidenteari igorritako mezua: "Egingo denaren inguruko informazioa ez igortzeak ere ez du laguntzen; badakigu merkatuaren jarrera zein azkar aldatzen den".
Espainiarentzat bigarren erreskatea orain edo geroago eskatu behar ote duen zalantza dauka gobernuak. Arrisku sariak behera egin du nabarmen azken egunotan, eta horri begira dagoela esan du Mariano Raxoik. Galizian zein Araban, Bizkaian eta Gipuzkoan hauteskundeak daude urrian, baina Espainiako presidenteak dio erreskatearen erabakia hartzean ez duela kontuan hartuko faktore hori.
Era batera edo bestera, Espainiak ez du argitu oraindik bigarren erreskatea eskatuko ote duen, nahiz eta Europako Batasuneko erakundeek bide hori zabaltzeko urratsak egin dituzten; azkena, Alemaniako Auzitegi Konstituzionalak oniritzia eman izana erreskate funts iraunkorrari (ESM). Berri hori eta Europako Banku Zentrala Espainiako zorra erosteko prest dagoela gogorarazi dio Raxoiri Almunia komisarioak, betiere erreskatearen inguruan erabakia har dezan behingoz.
