Luis de Guindos Espainiako Gobernuko Ekonomia ministroak ostiralean iragarri zuen bezala, bankuak erreskatatzeko eskatu dio gaur ofizialki Eurotaldeari, baina ez du zehaztu dirua milioi horiek nola banatuko dituzten. Erreskatearen baldintzak uztailaren 9rako negoziatu nahi ditu De Guindosek Eurotaldearekin.
Erreskatearen zenbateko zehatza negoziazio horren ostean erabakiko dute. De Guindosek espero du mailegua epe luzerako izango dela, 15 urtetik gorakoa, eta interes tasak %3 edo %4 inguruan egongo direla.
Orain arte De Guindosek ez du argitu nahi izan BEZ zerga igotzeko asmoa ote duen, nahiz eta Nazioarteko Diru Funtsak eta Europako Batzordeak hori eskatu.
Bankuen kapitalizazio zuzena
Ekonomia ministroaren arabera, finantza erakundeak zuzenean kapitalizatzea, estatuaren eskuetatik pasa gabe, "erabat irekita dagoen aukera da". Aukera hori datorren asteetan edo hilabeteetan Europako agintariekin adostuko duela uste du Ekonomia ministroak.
Merkel eta Hollande, asteazkenean
Angela Merkel Alemaniako kantzilerrarekin eta François Hollande Frantziako presidentearekin bilduko da asteazken arratsaldean De Guindos. Bileraren xede nagusia ekainaren 28 eta 29ko goi bilera prestatzea da.
Horren aurretik, gaur Hollandek elkarrizketa izango du Mario Draghi Europako Banku Zentraleko presidentearekin eta Christian Noyer Frantziako Bankukoarekin.
