Asteartean Nazioarteko Diru Funtsak belarri batetik esandakoa beste belarritik esan dio Espainiako Bankuak: erreforma gehiago egin beharko lituzke. Bi erakundeek bat datoz BEZa gehiago igotzeko eskatzean, edo lan erreforma motz geratu eta malgutasuna handitzeko neurri gehiago hartu behar direla esatean.
Ohiko eskaerak dira biak ala biak. Presioak presio, legegintzaldia amaitu bitartean halakorik egiteko asmorik ez du PPren gobernuak.
Diru sarrerak handitzeko beharra ikusi du Espainiako Bankuak, 2014.urteko txostenean. Zerga zuzenen bidez igo beharrean —errenta zerga, ondarearen gainekoa edo sozietateena— zeharkako zergen bidez egin nahi du, hots, produktu bat erosteagatik edo zerbitzu bat kontratatzeagatik ordaintzen diren zergen bidez.
BEZa da zeharkako zerga garrantzitsuena, eta dagoeneko igo da legegintzaldi honetan, bankuen erreskatearen truke Bruselak aginduta: 2012ko irailean tasa orokorra %18tik %21era igo zen, eta murriztua %8tik %10era. Ez zen lehen aldia izan Espainiako gobernu batek kanpoko presioen aurrean men egin eta zerga hori igo zuena. 2010eko uztailean ere egin zuen Jose Luis Rodriguez Zapatero sozialistak: tasa orokorra %16tik %18ra igo zuen, eta murriztua %7tik %8ra.
