Gipuzkoako eraikuntza sektoreko langileek bi urte daramatzate lan hitzarmena berritu gabe. Lehendik ez aurrera eta ez atzera zeuden negoziazioei beste arazo bat batu zaie orain: Espainiako eraikuntzako lan hitzarmena. CCOOk, UGTk eta patronalak sinatu zuten joan den astean. ELAk salatu du edukien %90 Espainian erabakitzea adostu dutela, eta hitzartutako puntuak ezinbestean aplikatu beharko direla probintzia mailako itunetan. Halakorik «inondik inora» ez dutela onartuko esan du Luis Fernandez sindikatuko Hainbat saileko idazkari nagusiak.
«Lan baldintzak homogeneizatu nahi dituzte probintzia guztietan», esan du. Soldatetan, esaterako, urtean 10.000 euroko aldea dago Gipuzkoako langileen eta Espainiakoen artean. Hain zuzen, soldatak eta lanaldia dira CCOOk, UGTk eta patronalak Espainian erabaki nahi dituzten edukietako bi, eta probintzia mailako itunen esku «kontu hutsalak» geratuko lirateke.
ELAko ordezkariek Adegiri galdetu diote ea Espainiako hitzarmen hori onartuko duen. «Adegik estatuko hitzarmenari zer kasu egingo dion ikusi behar dugu, baina, hori gorabehera, gu borrokarako prest gaude». Atzo bertan, sindikatuak deituta, elkarretaratzea egin zuten Adegiren egoitzaren aurrean. Besteak beste, lan hitzarmena betetzeko galdegin zioten enpresaburuen elkarteari, «orain orduko hiruzpalau euro irabazten ari direlako langileak».
Espainiako eraikuntzako lan hitzarmenak kezka eragin du Gipuzkoan
CCOOk, UGTk eta CEOE patronalak Espainian adostu nahi dituzte hitzarmeneko edukien %90
Iruzkinak
Ez dago iruzkinik
Ordenatu
