Espainiaren zorraren kalifikazioa Aa1 mailatik Aa2ra jaitsi du Moody's-ek

Atzokoa egun garrantzitsua zen Espainiako Gobernuarentzat. Goizez, finantza sistemaren erreforma onartu behar zuten Kongresuan; arratsaldez, banku eta aurrezki kutxek dituzten kapital beharren inguruko datuak eman behar zituen Espainiako Bankuak. Eta egun berean, baina hori guztia baino lehenago, zor publikoaren kalifikazioa jaitsi zion Moody's rating agentziak.

Zor publikoa Aa1 mailatik Aa2 mailara jaitsi zion, eta etorkizunerako aurreikuspenak ezkorrak zirela adierazi zuen, besteren artean, banku sektorea berregituratzeak eragingo dituen gastuengatik eta Gobernuak Autonomia Erkidengoengan duen kontrak eskasagatik. Izan ere, Moody'sek egindako kalkuluen arabera, Espainiak 40.000 eta 50.000 milioi euro artean jarri beharko ditu bankuen eta aurrezki kutxen kapital beharrak asetzeko.

Iragarpen horien aurrean, Espainiako Ekonomia Ministerioa ez zen isilik geratu, eta esan zuen ez zitzaiola egokia iruditu Espainiarentzat hain une erabakigarrian horrelako iragarpenak egitea. Soledad Nuñez Altxorreko zuzendari nagusiak gogorarazi zuen, Moody'sek abenduan esan zuela gutxienez hiru hilabete itxarongo zuela berriz Espainiaren zorraren kalifikazioa berrikusteko, baina ez duela egindutakoa bete. Horren guztiaren ondorioz, Espainiaren arrisku saria zertxobait handitu zen.