Euforia izan beharrean, abaildura Europako burtsetan

Porrot egoera saihestea lortu ostean, merkatuak lasaitzea lortuko zuela uste zuen Barack Obama AEBetako presidenteak. Igoerekin hasi zuten eguna Europako burtsek. Wall Streetek ireki ostean, ordea, guztiz aldatu zen eguna. AEBei kalifikazioa jaisteko mehatxua egin zieten aurreko asteetan kalifikazio agentzia nagusiek, eta beldurrak hor jarraitzen du. Maila apaltzeak eragin negatiboa izango luke herrialdearen zorrean, inbertsoreek kalifikazio gorena dutenak lehenetsiko lituzketelako, Alemaniarena kasu. Alabaina, datu bat izan zen burtsak hankaz gora jarri zituena: ISM indizea: manufaktura sektorea neurtzen duen indizea. Geldialdian sartu zela jakin zen atzo.

Iazko ekainetik izandako jaitsierarik handiena izan zuen Madrilgo Ibex-35ek, %3,24koa; Milango burtsa %3,87 jaitsi zen; Frankfurtekoa, %2,86; Pariskoa %2,27 eta Londreskoa %0,7. Aldiz, arrrisku primek gorakada handia izan zuten. Italiarenak goia jo zuen, 252 puntu iritsita, eta Espainiarenak ere justu-justu ez zuen marka hautsi 370 puntura heldu baitzen.