Europako Batzordeak 1.106 milioi euroko isuna jarri die E.ON eta GDF Suezi

Erakundeak historian ezarri duen bigarren isun handiena da, eta inoizko handiena energiaren alorrean

xabier martin
2009ko uztailaren 9a
00:00
Entzun
E.ON eta GDF Suez enpresek bat egin dute hainbat hamarkadatan Alemanian eta Frantzian gasaren merkatua murrizteko. Halaxe erabaki du Europako Batzordeak, eta, ondorioz, isuna jarri die enpresa energetikooi. E.ON eta GDF Suezek 553 milioi euro bana ordaindu beharko dituzte. Europako Batzordeak monopolioaren legea urratzeagatik sekula jarritako isun handiena da energiaren alorrean, eta orain arteko isun guztiak kontuan hartuz, historiako bigarrena.

Azken asteetan Europako Batzordeak beste isun handi bat ezarri du. Intel enpresa informatikoari 1.060 milioi euroko multa ezarri zion maiatzaren 13an, merkatuan duen nagusitasunagehiegikeriaz baliatu duela erabakita. Isunetan kopuru handi hori ezartzeko ildoak segida izan du, orain, energiaren alorreko bi enpresek ustez egindako monopolioaren legearen urratzea dela-eta.

Dena den, azken zortzi urteetan hainbat izan dira Europako Batzordeak ezarritako isun gogorrak monopolioaren legea haustegatik. Esaterako, 2001ean 855, 2 milioi euroko isuna jarri zien bitaminak merkaturatzen zituzten enpresa batzuei, akordio sekretuen bidez merkatua banatzeagatik. 2004an, berriz, Microsofti 497,2 milioi euroko isuna ezarri zion, sistema operatiboen merkatuan kuasi-monopolio bat gauzatzeagatik. 2007an berretsi zuen isuna EBko auzitegi batek eta urtebete geroago 899 milioi euroko isun berria jarri zion EBk, 2004an egindako lege urratzea ez zuzentzeagatik. 2007an ere beste isun gogor bat jarri zuen Europako Batzordeak: Otis, KONE, Schlinder, Thyssenkrupp eta Mitsubishi igogailu ekoizleek 992 milioi euro ordaindu behar izan zituzten.

Euskal Herrikoak

Europako Batzordeak merkatuaren legeak urratzeagatik ezarritako isunen zerrendan agertzen dira Euskal Herriko enpresa batzuk ere. 2001eko abenduaren 20ean EBk 313, 7 milioi euroko isuna jarri zien paperaren alorreko hamar enpresari, horien artean, Hernaniko Papelera Gipuzcoana de Zicuñaga eta Derioko Distribuidora Vizcaina de Papeles. Salneurriak ezartzeko eta merkatua banatzeko ados jarri zirela esan zuen Europako Batzordeak.



Hainbat enpresa ikertzen hasi dira botika generikoen salmenta mugatu dutelakoan

Frantziako Servier talde farmazeutikoa eta botika generikoak ekoizten dituzten hainbat enpresa ikertzen hasi da Europako Batzordea, botika generikoen salmenta mugatu dutelakoan.Europako merkatura botika generiko gehiago hel daitezen presioa handitu nahi du Europako Batzordeak. Zabaldu den ikerketak zerikusi handia dauka plazaratu berri duten alorraren lehiakortasunaren inguruko txosten batekin. Lehiakortasuna gauza dadin arazo anitz ikusten ditu Europako Batzordeak eta enpresen hainbat jarduera aipatzen ditu oztopo nagusi gisa. Hala, monopolioaren aurkako ikerketa batzuk martxan jarri ditu, eta ezagutarazi duten lehena Servier taldeari dagokiona da. Iaz, ezustean ikuskatu zituen taldeko enpresa batzuk, eta legea urratzen dutelakoan dago.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.