Euskadiko Kutxa-Ipar Kutxak "erabateko desadostasuna" azaldu du ohar baten bidez, Gasteizko epaitegi batek Eroskik eta Fagorrek jaulkitako ekarpenen inguruan emandako lehenengo ebazpenarekin, eta helegitea jarriko duela iragarri du. Epai horren arabera, Euskadiko Kutxak dirua itzuli beharko dio Eroskiren ekarpen baten erosleari, 14.800 euro hain zuzen. Kooperatibak ekarpena azaltzeko kaleratu zuen informazioa "ez oso garbia, idazkera nahasikoa, eta agian engainagarria" da, epailearen ustez.
Aurrezki kutxak dio, ezin duela onartu Eroskik emandako informazioa, "CNMVk balekotzat eman zuena", Euskadiko Kutxaren-Ipar Kutxaren ardura denik, "informazio horren mamiak ez duelako loturarik kutxarekin". Mondragon taldeko finantza erakundeak onartzen du epaitutako kasua "berezia" dela, baina uste du "epaia ez datorrela bat operazio zehatz horren salerosketaren inguruko baldintzekin".
Epaitutako Eroskiren ekarpena saltzean informazio "partziala, ez egiazkoa eta lerratu" eman zion Euskadiko Kutxak bere bezeroari epailearen arabera. Aurrezki kutxa ez dago ados balorazio horrekin. "Desadostasuna" azaltzen du oharrean, «probarekiko epaileak egindako balorazioarekin». Desadostasun hori, halaber, epaileak egindako "azterketa juridikoarekin" ere bada.
Argudio horiek guztiak tarteko, Euskadiko Kutxa-Ipar Kutxak epaiari helegitea jartzeko "asmo irmoa" iragarri du. Arabako Lurralde Auzitegietan jarri beharko du helegitea
40.000 erosle
Eroskik eta Fagorrek 2002-2007ko epean jauliki zituzten orain menpeko ekarpenak, eta operazio horien bidez 800 milioi eurotik gora lortu zituzten beren hedapen prozesuak finantzatzeko. Kaltetuak elkartearen arabera, 40.000 izan daiteke menpeko ekarpenen erosle kopurua.
Finantza erakundeen bidez saldu ziren ekarpenak. BBVAk saldu zituen Eroskiren ekarpen gehienak (%44), eta Santanderrek, berriz, Fagorrek jaulkitakoak (%57). Euskadiko Kutxak ekarpen guztien %21 baino ez zituen saldu (%27 Mondragon taldeko bazkideen artean saldutakoak ere zenbatuz).
