Panorama ekonomiko negargarria azaldu du Miguel Angel Lujua Confebaskeko presidenteak, Bilbon egindako agerraldian. Egoeraren larritasunaz ohartzeko haren alboan izan ditu Confebask osatzen duten hiru patronaletako presidenteak: José María Vázquez Eguskiza (Cebek), Pello Gibelalde (Adegi) eta Pascal Gómez (SEA).
Azken hamarkadetako krisirik okerrena dela egiaztatu du Lujuak. 2013a zenbatuz gero, gutxienez sei urte iraungo du, eta aurrekoetatik ateratzea baino zailagoa izango dela esan du.
Enpresen aldeko politikak aldarrikatu ditu Lujuak, "enpresak direlako egoera honetatik atera gaitzaketen bakarrak". Sozietate zergan kenkariak gutxitzeko mugimenduen aurrean, enpresen aldeko fiskalitatea eskatu du. Gizarte Segurantzaren kotizazioak ditu jomugan patronalak, bere datuen arabera, inguruko herrialdeek baino gehiago pagatzen dutelako hemengo enpresek eta horrek lehiakortasuna kentzen die.
