Emaitza onak bildu ditu Euskaltelek urtarriletik irailera bitartean. 44,9 milioi euroren irabazi garbiak izan ditu urteko lehen bederatzi hilabeteetan; zerikusirik ez iazko zenbakiekin, 2015eko irailean 3,3 milioi euroko emaitza negatiboa pilatu baitzuen, burtsaratzearen ohiz kanpoko gastuen eraginez. Izan ere, urte garrantzitsua izan zen iazkoa Euskaltelentzat: burtsara atera zen uztailaren 1ean, eta Galiziako R Cable bereganatu zuen azaroan 1.190 milioi euroren truke.
Aurtengo lehen bederatzi hilabeteetan 430,4 milioi euroren diru sarrerak izan ditu euskal konpainiak, iazko aldi berean baino %76,1 gehiago. Iaz R Cablek izandako diru sarrerak ere batera zenbatuz gero, ostera, talde berriaren diru sarreren igoera %2,2koa litzateke. Konpainiak azaldu du igoera hori batez ere etxebizitzen segmentuan izandako %4,4ko igoerari zor zaiola.
Emaitzak eskuan, Euskalteleko administrazio kontseiluak aho batez erabaki du akziodunei dibidenduak banatzea 2016ko emaitzetatik. Akzio bakoitzeko 0,15 euro gordin banatuko ditu, 22,77 milioi euro guztira.
