Urteko lehen lau hilabeteetan %8,8ko hazkundea izan du turisten kopuruak Araban, Bizkaian eta Gipuzkoan, iazko epe berarekin alderatuta. 97.000 inguru dira hiru herrialdeetan turismoari lotutako enpleguak, eta alorrak EAEko BPGaren %6 hartzen du. Turista batek, batez beste, 110 euroko gastua egiten du eguneko.
Datuok gaur eskaini ditu Eusko Jaurlaritzako turismo sailburuak, Alfredo Retortillok, turismoaren karga-gaitasunari buruzko azterlan baten aurkezpenean. Sailburuaren arabera, euskal herritarren iritziz "turismoak goraldia bizi du Euskadin". Herritarrek ikusi dute gorantz doala turisten kopurua. "Baina ez dute hori kezkaz ikusten, ez dutelako inolaz ere sumatzen beste toki batzuetako adinako saturazio mailetan gaudenik".
Nagore Espinosa azterketaren egileetako batek ere datu hori berretsi du gaurko azterketan: "Ez dago saturazio sentsaziorik. Guk bildutako datuen arabera, herritarren artean ez dago ezinegonik bisitarien kopuruarengatik; aldiz, haien balorazioa positiboa da".
Era berean, turismoaren alorrak, Retortilloren aburuz, "badu handitzeko tarterik Euskadin". Hori bai, sailburuaren ustez "turismoaren garapena hazkunde jasangarriaren irizpideetan oinarritu behar da".
"Gauza ez da soilik bisitarien kopuruari begira egotea", esan du. Turistek zer egiten duten ere "monitorizatu" behar dela uste Turismo sailburuak, "hazkunde orekatua lortzeko helburuarekin". Turisten fluxua banatzeko beharra aipatu du, "ez daitezen guztiak toki geografiko gutxi batzuetan elkartu".
