Euzkitze eta Sarasua

Intermitenteen gisako bertsolari bihurtu dira Jon Sarasua eta Xabier Euzkitze; tarteka baino pizten ez direla, jendaurrean bederen. Burtsa ere, orain argi orain ilun dabil: Fitch rating etxeak Portugalen kaudimen kalifikazioa txartu du, AA- mailara, eta, hurrena Espainia izango ote den beldurrak, akzio salmentak eragiten ditu gurean; 11.000 puntuen langa urrundu zaio Ibex-35 (-%1,18) indizeari, egunean zehar %2ko potoa egin ostean. Eskerrak azken puntuan pitin bat indartu zen. Banku errima duten Santander etaSabadell %2na pasa jaitsi ziren, eta BBVAk ere %1,35 galdu zuen. AEBetako merkataritza eta etxebizitza berrien salmentak ere ez ziren uste bezain onak izan. 2.305 milioiren salerosketa oparoan, Futboleko Munduko Kopa Espainian emango duen Telecinco (+%2,75) nabarmendu zen, eta teleikusle BECtekada eragingo dio, noski. Euroa 2009ko maiatzetik izan duen maila apalenean da dolarrarekiko. Zalantzak direnean, txapelduna nagusi.



Garoñako zentral nuklearraren aurka auzibidera jo dute Iberdrola (-%1,29) eta Endesak (-%1,17); Galiziako Xuntak ere beste horrenbeste egingo du aurrezki kutxen berregituratzea lagundu behar lukeen FROB funtsaren bueltan. Legelariak nagusi.



Gas Natural (-%1,61) zorra berregituratzen ari den enpresen taldean sartu da, 4.000 milioiren mailegua 18 bankurekin birnegoziatu ostean. Fenosaren erosteko zorpetu zen Katalunian egoitza duen enpresa. Sabadell bankua 300 bulego saltzekotan dabil.